بقلم : أمير طلعت
طبعا هتألش علىّ وتكمل العنوان ” ومش قادر على بعدك ” … ماعنديش مشاكل مانا أصلا بألش على الأغنيه
سيبنا من الألش وخلينا فى موضوعنا …. موضوع إنك تبقى عايز الحاجة وفى نفس الوقت مش عايزها او مش عارف تبتديها .. وعلى فكرة إنت كده مش مريض ولا عندك إنفصام ولا أى حاجة .. إنت طبيعى جدا وزى الفل ، كل ما فيها إننا إتشبعنا بحاجات عكس بعض نتيجه التربية بتاعتنا
– عايز أجيب اللون اللى باحبه ومش عايز أجيبه علشان مش بيعجب أصحابى
– عايز أنجح ومش عايز أتعب
– عايز أدخل الكلية اللى باحبها ومش عايز أدخل اى حاجة غير كليات القمة علشان منظرى
– عايز البلد تنضف بس مش عايز أنضفها
– عايز البنات ياخدوا حريتهم بس مش عايز أتخلى عن سلطتى الذكورية
– عايز أتجوز بس مش عايز أتحمل مسئولية
– عايز أنمى موهبتى بس مش عايز أقضى وقت طويل فيها
– عايز أحقق حلمى ومش عايز أبذل مجهود او حتى أدقق فى تفاصيل حلمى
وحاجات تانية كتير عايزها بس مش عايزها
دايما فى الوقت ده من السنة بنتمنى أمنيات كتير لبعض ولنفسنا .. بس بتفضل مجرد أمنيات لغاية لما أعوزها بجد وأبتدى أدقق فى تفاصيلها وأرسم خطه علشان أوصلها.
انا عن نفسى بقى
عايز أعوز اللى انا فعلا عايزه J
أو أقولكم على حاجة كمان …. انا عايز أعرف أنا عايز إيه J