بقلم : أمير طلعت
المصطلح الاولانى كلنا متعودين عليه وبنردده لكن التانى دا غريب شوية علينا …. إيه الفرق بينهم بقى ؟؟
ملحوظة : الكلام اللى جاى دا وجهة نظرى الشخصية اللى ممكن تختلف معايا فيها أو تتفق
رجل الدين :
هو الشخص المسئول عن ممارسة الطقوس الدينيه وهو اللى بيعلم الشعب أصول الدين والعقيده .. وغالبا ممكن يعمل أى حاجة فى سبيل العقيده بتاعته
معظم النماذج اللى بنشوفها لرجال الدين فى مجتمعنا الشرقى العربى للأسف بتبقى نماذج لناس ممكن تدوس على أى شخص لمجرد بقاء العقيده وإعلاء الدين نفسه والحفاظ على الكيان الدينى والمنظومة اللى هو تابع ليها … علشان كده مستوى التعصب عندنا ما شاء الله عالى ، وكله للحفاظ على العقيدة … أما بقى اللى بيفلت من الشريحه دى غالبا بيتنقل لمنطقه رجل الله
رجل الله :
المصطلح دا إتعملته من الكتاب المقدس .. ماشوفتش واحد إتقال عليه رجل دين ، لكن أى حد كان بيتكلم بكلام الله للناس كان بيتقال عليه رجل الله
دا الشخص اللى كان مش بيفرق معاه رايح يكلم مين ولا هيتكلم يقول إيه لأنه واخد رساله من الله شخصيا للشعب او للمكان اللى رايحله .. ممكن هو يتعرض لأى شكل من الضغوط والإضهاد والرفض لكن هو مش بيعادى حد .. هو ما إلا حامل رسالة من الله مش بيفرق معاه شكله ولا رأى الناس فيه ومش بالضرورة يكون ليه سلطان على مجموعه من الناس تحتيه .. أهم حاجة بالنسبه له إنه يكون على تواصل مظبوط مع الله و إنه يوصل كلام الله بكل أمانة و وضوح
فيه فرق بقى بسيط بيخلينى أحب مصطلح رجل الله أكتر من رجل الدين
– رجل الدين واحد فاهم قوى عقيدته وأفكار الجماعه اللى بينتمى ليها لأنه (رجل الدين) .. علشان كده فيه شوية شروط ودراسات ومراحل لازم يعدى عليها علشان الجماعه بتاعته تعتمده
– رجل الله واحد متواصل كويس جدا مع الله و عارف يكون فى علاقة شخصية معاه ، علشان كده الله بيستأمنه على الكلام المهم اللى لازم يوصل للناس … ودى مش محتاجه شروط غير إستعدادك إنك تتقابل مع الله أيا كان سنك أو ظروفك أو مستواك العلمى أو الثقافى أو الإجتماعى
” لأَنَّ عَيْنَيِ الرَّبِّ تَجُولاَنِ فِي كُلِّ الأَرْضِ لِيَتَشَدَّدَ مَعَ الَّذِينَ قُلُوبُهُمْ كَامِلَةٌ نَحْوَهُ ” (ترجمة فان دايك)
” يُشْرِكُ اللهُ خائِفِيهِ فِي أسْرارِهِ. يُعَلِّمُهُمْ مَعْنَى عَهْدِهِ. ” (الترجمة المبسطة)
من آيات الكتاب المقدس