رمضان جانا …. اهلا رمضان

ناس كتير اوى بتستنى رمضان من السنة للسنة وبتفرح بيه وبتغنى ليه

رمضان رمضان والله بعودة يا رمضان … ورمضان جانا وفرحنا به بعد غيابه وبقاله زمان

بس لما تيجى تفكر تلاقى فعلا الناس معاها حق انها تتبسط برمضان وتغنى له

فى رمضان بتشوف المحبة اللى تخليك تدى ميه او عصير لأخوك فى وقت الفطار وانت ماتعرفش هو اللى بتديله ده مسيحى والا مسلم

فى رمضان بتشوف الغنى اللى معاه فلوس بيطلع ويعمل مائدة كبيرة عشان يعزم ويفطر ناس هو مايعرفهومش

فى رمضان بتشوف ازاى الناس عندها الاستعداد انها تسيطر على نفسها وتتحكم فى غضبها عشان ماتعملش مشكلة او خناقة

بتشوف العربيات بتعدى بعض بقدر الإمكان ومحدش بيكسر على التانى  والناس بتقدم بعض عشان الطريق يمشى والكل ياكل عيش

فى رمضان بتشوف ازاى الناس بتقدر تبطل السجاير مثلا لحوالى اكتر من 12 ساعة متواصل بعزيمة واصرار

بتشوف الكذب بيقل والخبث والافتراء والمراوغة بالكلام والشتيمة و بيبقى فى قدر من الامانة والرغبة فى مساعدة الناس

 بتشوف ازاى الرجل بيقدر مايتحرش بإنسانة لفظيا او جسديا وبيحاول يسيطر على نفسه ويتحكم فيها

فى رمضان بتشوف ان الانسان بيفكر فى نفسه بشكل اقل وبقى بيشوف مصلحة الاخر وبقى عنده الرغبة فى عمل الخير له……. وفى مشاهد ومواقف كتيره ممكن نقولها

بس للأسف كل ده بيبقى مؤقت ومش بيدوم على طول بيحصل كده لمدة شهر بس و خلال الشهر بيبقى لغاية الساعة 7 م بس.

اللى بيخلي الامر يستمر او يتوقف هو هل ده بيحصل من جوايا ؟بقرار وعن قصد انى اتغير من جوه فتكون النتيجة ان سلوكى من بره يتغير ؟ ف آى التزام دينى بنمر بيه سواء كان رمضان (الخاص بإخواتنا المسلمين )او حتى صيام الرسل او باقى الاصوام (الخاصة بإخواتى المسيحين) بيبين ان البشر عندهم رغبة فى الارتباط بإله , رغبة فى عمل الخير ورغبة فى الوجود وايجاد الهوية .

فعشان الأمر ينجح ارتبط بالإله , اعمل الخير للناس وعيش بمحبة وسط الناس لان الإله ده محبة وبيحبك وبيحب كل الناس برضو.اسعى انك تعرفه كل يوم ويكون ليك علاقه بيه عشان تتغير ويبقى اللى طالع منك نابع من علاقتك بيه مش من واجبات لازم تأديها.

باسم كمال