بقلم : أمير طلعت طبعا كلنا فاكرين المشهد المشهور من فيلم الناظر لما علاء ولى الدين و أحمد حلمى كانوا قاعدين على سلم المدرسة والدنيا برد وأحمد حلمى حران جدا .. وعلاء ولى الدين بيسأله بإستغراب
– إنت بتعمل إيه يا عاطف ؟؟
= حران حران
– يا راجل !! هى الدنيا حر ؟؟ طيب مش تقول
وإبتدى بعد ما كان بردان جدا فجأة بيقلع الجاكيت بتاعه و يخلى عاطف يهويله
الحقيقة كلنا بناخد دور صلاح إبن الناظر كتير … بس مش فى برودة وحرارة الجو
– إيه اللى بتعمله ده ؟؟
= يابنى كل الناس بتعمل كده .. إنت دقه قديمة
– يا راجل !! يعنى كل الناس بتعمل كده عادى ؟؟ طيب مش تقول
– إيه الفكرة دى ؟؟
= دى فكرة فلسفية متحررة مايفهمهاش الأصوليين اللى زيك
– يا راجل !! يعنى انا لو إقتنعت بيها أبقى متحرر ؟؟ طيب مش تقول
– إيه الموضة دى ؟؟
= يابنى انت اللى دقه قديمة .. مش دريان بالدنيا
– يا راجل !! يعنى الدنيا بقيت كده عادى ؟؟ طيب مش تقول
– هو إنت مشتت ليه كده ؟؟
= دا إسمه overthinking يا جاهل .. انا واحد مفكر بسأل وبأشك فى أى حاجة
– يا راجل !! يعنى انا كده لسه مابقيتش مفكر ؟؟ طيب مش تقول
– هو مش كده عيب ؟؟
= عيب إيه يابنى .. إنت عايزهم يقولوا عليك ملزق وبتاع ربنا وماشى على النمط الدينى
– يا راجل !! يعنى انا لو كملت كده ابقى ملزق ؟؟ طيب مش تقول
حاجات كتير وأمثلة أكتر عن حاجات بنبقى مقتنعين بيها لغايه لما نحس إننا ممكن نكون مرفوضين او إزاى عايشين بالفكرة دى .. فبنغير طريقتنا ومبادئنا
المشكلة أحيانا إننا لما بنتغير بنجيب الإتجاه المعاكس تماما وعلى غفلة ، زى صلاح إبن الناظر كده .. من واحد بردان جدا وبيحاول يدفى نفسه لواحد حران جدا بيقلع الجاكيت بتاعه
طيب إنت أخدت وقتك فى التفكير ؟؟
فكرت أساسا ولا إعتمدت بس على ان فيه حد قالك ؟؟
مين اللى قال إن كل فكرة قديمة لازم تبقى غلط ؟؟ فيه حاجات قديمة صح .. وفيه حاجات قديمة ينفع تتطور مش تتغير خالص.
دا حتى الصيف والشتا بينهم فصلين “مراحل إنتقاليه” علشان الجو مش من الطبيعى إنه يقلب فجأة بين ويوم وليلة.
“التغيير الحقيقى بياخد وقت”
أخبار الجو عندك إيه دلوقت يابو صلاح ؟؟