بقلم : شادي جاد
ضيعت وقت كتير قوي من عمري قص و لزق لذكريات انتهت ، محتاج اعترف بان النظر في عيون اللي فات ملوش لزمة ..
انا هاكتب لبكرة جواب … اقوله فيه :
عزيزي غدا
تحية طيبه و بعد ،
انا خارج من الحبس النهاردة و انا دفعت عقوبة امبارح ، هنتقابل مع الامل و الفرح ،عندي حلم عندك مش هتنازل عنه .
اه احب اقولك
شعري هيطول اللي شاله اليأس و هيغطي على جرح الماضي مش هتنازل عن انه اعيش الحياه لانه ..
كفايه اللي ضاع …
صديقك
سجين سابق
و خرجت من السجن لاقيت ضيوف عجيبة ، منهم اللي كان معايا في السجن و منهم اللي كان مستنيني يحتفل بخروجي و كل واحد بيسلم عليا فيهم اللي شجعني و فيهم اللي احبطني و كأنه بكره اللي مستنيه مش جاي لكن انا قررت انه هوصل لحلمي . لاقيت الخوف و سلمت عليه بكل جراءة ، رد عليا و قال : انت مش فاهم اللي بيحصل حواليك؟؟ !!
رديت و قلت : اصل اللي حوليا موجود مش هيتغير ايا كان .. يا اما استخبي يا اما احسبها و اعدي .. و انا حاسبها و عارف مين اللي في صفي
بس بعد فترة مبقاش الحماس زي ما كنت خارج . مشيت و انا جوايا برضو قلق .. هل هاوصل لحلمي فعلا ولا زي ما الخوف قالي فيه حاجات كتير حوليك مش هتوصلك .. ديالهموم اكتر من الناس والنجوم ، و انا انسان ورق مع الزمن هيصفر و يتقطع بسهوله في مواجهة بحر الزمن و اللي فيه ، و بين قوة الماضي اللي بيطاردني ارجع السجن تاني ..
قررت ابعت جواب لبكره اعتذر فيه عن عدم مرواحي ليه و اكتبله عن احساس القلق ، و الخوف و اللي عمله معايا ، و انه لا انا قادر اروح ليه ولا عاوز ارجع للسجن تاني .
و انا في الحالة دي لاقيت جواب مرسل من بكره ليا و كان جاي في ايدين الامل بس كانت تعبانه و يدوبك وصلت ليا الجواب و قعدت لانها مش قادرة تقف بس المهم وصلت الجواب . اللي فيه بكرة كاتب و بيقول :
عزيزي الانسان
تحية طيبة و بعد ،
حبيت اكتبلك بالاسلوب اللي انت هتفهمه مع اني انا شايف اكتر منك و فيه حاجات لو قلتهالك مش هتفهمها او هتستوعبها دلوقتي لكني عاوز اوصلك حقايق مهمة هتفيدك في الطريق لحد ما توصل عندي هنا و تفهم .
اولاً : فيه اصدقاء ليك كانوا مساجين بيسلموا عليك من هنا و بيقولولك هما عدوا باللي حصل معاك و نفس طريقك و في النهاية وصلوا
ثانيا : احب اقولك انه فيه ضيوف كتيرة اوي زي اللي شفتهم عندك دول هتقابلهم في سكتك ، بس خلي عنيك عليا عشان تاخد قوة تكمل
ثالثا : انا عرفتك انه طريقك صعب ، بس انا هبقى معاك و هتستمتع بالصعب و انت شايفني معاك ، انا بكرة ـ انا المستقبل – انا النهاية اللي بيتمناها اي حد ، انا اقرب مما تتخيل ليك .
رابعا : في حاجات في السكة انت ممكن متفهمهاش ، او ممكن اي حد يوقع بنا و يقولك انه انا مش معاك او انه انا مش جاي ، و انا مش ببعت غير الامل و الايمان و المحبة و النصح و الارشاد بالجوابات
خامسا : في جروح في الطريق ، اوعي تغير مبدئك ، ولا تلبس قناع يخفيهم ، سيبني اعالجهم انا
سادسا : خليك واثق في حاجتين علشان تعرف تكمل مهما حصل ، انه انا مشتاق ليك جدا زي ما انت مشتاق ليا و عاوزني و بتحبني ، بص لقدام متبصش وراك على الماضي علشان تعرف تجري اسرع
سابعا : لما بيجي عليك حاجات زي كده خليك واثق و عارف انه مش بعمل او ببعت حاجة و خلاص في حياتك ، بعمل كل حاجة في مكانها ، و الماضي اثبت ليك و المستقبل هايثبت ليك ، بس انا بعرفك علشان متكنش فشلان في وقت .
احب في النهاية اقولك حاجتين
لما يجي الوقت هتشوف المعجزة
كمان انا جاي بسرعة ..
بس اوعى تضيع وقت ..
صديقك العزيز
غدا – المستقبل – بكره
ملحوظة .. مرفق مع الجواب بعض صور اشخاص كانوا مساجين .. تقدر تشوف اللي حصل معاهم و فيه عناوين ناس هيقلولك على اللي بيحصل معاهم هتستفيد جدا ..
خلصت قراية الجواب
و قررت ……
للموضوع بقيه ..