ديسمبر أخر أيام فى السنة أخر شهر، أخر كل حاجة ، اخر احاسيس هنحسها ، اخر مرة نشوف ناس كنا بنحبهم ، خليط من المشاعر ، حنين لحاجات فاتت فى الماضى، وخوف من المستقبل، وشوق للسنة الجديدة يغلب علية خوف متدارى من ان السنين تفوت ونكبر .. مشاعر مختلطة .

 وحشونا الى مبقوش معانا، ووجعنا فراقهم واحنا من جوانا مقتنعين انهم مش هيبقوا موجودين السنة الجديدة معانا .

 والناس الى معانا بس خايفين يمشوا ، ديسمبر يمثل النهاية ..  واحنا معظم الوقت مبنحبش النهايات .. احساس ان اللعبة خلصت .. المسلسل خلص .. الدراسة خلصت .. ان سنة من عمرنا خلصت وفرصها خلصت وانتهت.

غريبة ان جوانا حزن على سنة انتهت شوفنا فيها كتير .. وفرحانين بسنة جديدة مجهولة، يمكن دي نفس فكرة  ان احنا منعرفش الغيب .. جايز لو كنا عرفناه  كنا هنفضل زعلانين على الى جه واللى مجاش ومنتظرين الابتلاء. انتظار الفرحة متعب وصعب ما بالك انتظار بلاء جديد او اختبار صعب من ربنا احساسك هيبقي ايه !

كلنا شوفنا الحلو والوحش السنة دي، مفيش حد غالب عليه الحلو بس ومحدش غالب عليه الحزن بس ..

 كلمة وحدة لازم تتقال

” الحمد لله ” على نعمة الرضا وعلى نعمة الصبر وعلى نعمة الأهل وعلى نعمة الاحساس وعلى نعمة شويه الصحاب الى فى كل ابتلاء بتلاقيهم جمبك.

وعلى نعمة الضمير اللى لسه بيأنبك بعد كل غلطة، وعلى نعمة البدايات والفرص الجديدة اللي بناخدها وبنعطيها لبعض، وعلى نعم ربنا كلها علينا .

يارب أرزق كل واحد صبر الفرحة الى نفسه فيها، وارحمنا برحمتك دنيا واخرة، وطبطب على قلوب الغلابة الى ملهمش غيرك، وصبر كل قلب اتوجع، قلب كل ام اتوجع وكل أب تعب في حياته ولسه بيتعب عشان عياله، وعينا على دينا ودنيتنا وقربنا منك كل لحظة وكل سنة.

‏وفي العام الجديد..

‏ اللهُم خيرًا في كلّ اختيار، ونُورًا في كل عتمة، وتيسيرًا لِكل عسير، وواقعًا لِكل ما نتمنّى، اللهم بحجم جمال جنتك أرني جمال القادم فى حياتي وحقق لى ما أتمني، واشرح لى صدرى، اللهُم الرضا الذي يجعل قلوبنا هادئة،وهمومنا عابرة، ومصائبنا هيّنة.

كل عام وانتم بخير وقلوبكم بخير .

اسراء السندروسي